Wimbakara Baligrafi dados sinalih tunggil parikrama sane kaanggen memperingati Bulan Bahasa Bali. Baligrafi inggih punika gambaran utawi lukisan sane madue suksman sane mawit saking pupulan-pupulan aksara Bali sane sampun kasusun. Lumrahnyane Bulan Bahasa Bali kalaksanayang ring Bulan Februari, lan kadagingin olih makudang-kudang wimbakara sane kaanggen ngukuhang Bahasa, Aksara lan Sastra Bali.
Warsa 2020 dados warsa sane mabuat pisan majeng ring I Kadek Justiawan, mahasisia Pendidikan Bahasa Bali punika sida ngamolihang jayanti ring wimbakara Baligrafi. Saking makudang-kudang pamilet ring Kabupaten Buleleng, ipun sida molihang Jayanti 2 Putra/Putri ring yusa 18-25. Wimbakara punika kalaksanayang olih Dinas Kebudayaan Kabupaten Buleleng ring 5 Februari 2020. Mahasisia saking Desa Ularan niki kajudi mangda ngangganin Kecamatan Seririt, saking utsaha-utsaha ipun malajahin ngawi Baligrafi sampun sida molihang asil sane becik pisan.
“Pastika garjita pisan manah tiang, yadiastun molihang jayanti 2. Santukan saking makudang-kudang pamilet wimbakara niki, tiang prasida molihang jayanti 2. Lianan punika, wimbakara niki mabuat pisan majeng titiang, krana ngabakta kecamatan Seririt ring wimbakara seni lan budaya sane kalaksanayang olih Dinas Kebudayaan Kabupaten Buleleng niki”, baos Justiawan ring wimbakara Baligrafi, Bulan Bahasa Bali warsa 2020. Pastika bagia pisan I Kadek Justiawan santukan sida ngalaang makudang-kudang pamilet wimbakara saking kecamatan lianan ring Kabupaten Buleleng.