Tiga mahasiswa Program Studi Pendidikan Bahasa Bali, Universitas Pendidikan Ganesha (Undiksha), nglaksanayang Seminar Proposal (Sempro) ring rahina Anggara, 29 September 2026, ring Ruang Jayaprana, Fakultas Bahasa dan Seni, Undiksha. Parikrama puniki kalaksanayang antuk sesi presentasi proposal, pabligbagan, miwah wewehan saking guru waktra miwah guru panureksa.

1. Sesi kapertama Seminar Proposal kakawitin olih Komang Ririn Ayu Ningsih (NIM. 2312051004). Ring sesi puniki, proposal tatilikan sane kasobyahang mamurda “Seseleh Pawigunan Media Pembelajaran Website Parasali sajeroning Paplajahan Aksara Bali ring Kelas IV SD Lab School Undiksha”.

Guru waktra sane rauh ring seminar puniki wenten Bapak Dr. I Wayan Gede Wisnu, S.S., M.Si. miwah Ibu Ida Ayu Sukma Wirani, S.S., M.Pd., taler wenten Guru Panureksa Ibu Ida Ayu Putu Purnami, S.S., M.Pd., miwah Bapak Ida Bagus Made Ludy Paryatna, S.S., M.Pd.

Tatilikan Komang Ririn Ayu Ningsih matatujon nilikin pawigunan media pembelajaran website Parasali ring paplajahan Aksara Bali kelas IV SD Lab School Undiksha. Tatilikan puniki nganggen metode deskriptif kualitatif mangda prasida ngamolihang data indik pawigunan media ring pamargi paplajahan.

Ring sesi mabligbagan, makudang-kudang pitaken miwah wewehan, sekadi napi sane ngawinang panilik milih SD Lab School Undiksha pinaka genah tatilikan miwah website Parasali pinaka media pembelajaran sane kaanggen ring tatilikan puniki. Makudang pitaken punika kacawis olih narawakia Komang Ririn Ayu Ningsih ngangge basa sane dengan karesepang majeng ring pamilet miwah sang sane mapitaken.

2. Seminar Proposal ring sesi kaping kalih kasobyahang olih Putu Listya Dewi (NIM. 2312051018) sane mamurda “Media Pembelajaran Roda Aksara Kaanggen Nincapang Kewagedan Nyurat Aksara Bali Sisia Kelas V Ring SD Negeri 4 Penarukan”.

Guru Waktra sane rauh ring Seminar punika wenten Tu Aji Ida Bagus Rai, S.S., M.Pd. miwah Ida Bagus Made Ludy Paryatna, S.S., M.Pd. Taler wenten guru panureksa Bapak Dr. I Wayan Gede Wisnu, S.S., M.Si. miwah Bapak Dr. I Ketut Paramarta, S.S., M.Hum.

Panuek tatilikan punika ngenenin indik ngawigunayang media pembelajaran Roda Aksara mangda prasida nincapang kawagedan nyurat Aksara Bali siswa kelas V ring SD Negeri 4 Penarukan. Media puniki kaanggen antuk ngaryanin paplajahan sane lewih menarik miwah interaktif mawinan para sisia prasida uning, eling, miwah presida nyurat Aksara Bali sane patut.

Sesi mabligbagan ring seminar puniki wenten makudang-kudang pitaken miwah wewehan sekadi napi sane mawinan panilik nilikin tatilikan punika, napi mawinan panilik milih media roda aksara, lan napi kelewihan media roda aksara. Miwah penampen olih guru panureksa ngenenin indik basa sane kaanggén ring tatilikan miwah posisi panilik dados napi ring tatilikan punika.

3. Sesi katiga kasobyahang olih Ni Nyoman Meliaria (NIM. 2312051003). Ring sesi puniki, proposal tatilikan sane kasobyahang mamurda “Seseleh Sémiotika ring Komik Digital Satua I Jaum Desa Pedawa”.

Tatilikan puniki ngeninin indik semiotika sajeroning komik digital satua I Jaum ring Désa Pedawa. Proposal puniki matatujon nlatarang kawéntenan satua I Jaum pinaka folklor ring Désa Pedawa miwah panglimbaknyané sajeroning komik digital. Makudang-kudang pitakén, wewehan, miwah panampén kaicén olih guru waktra miwah guru panuréksa sajeroning nguningin pangresep utawi negepin proposal mahasisia.

Proposal Ni Nyoman Meliaria polih wewehan indik murda tatilikan sané patut kauratiang malih sajeroning tata cara nyelehin tatilikan antuk folklor miwah nglimbakang ring semiotika, utawi dados katuekang nyelehin sajeroning tanda verbal miwah nonverbal ring komik inucap.

Pantaraning murda miwah bantang pikobet taler mangda jenar kawéntenan jejering miwah panandangnyane. Sajeroning kartu data mangda tatas kaunggahang napi sané kanggén nepasin, kaunggahang imba, miwah katlatarang indik teges denotasi saha konotasinyané.

Malarapan antuk parikrama seminar proposal puniki kaaptiang prasida ngicénin ius ring panglimbak sastra lisan ring Bali, utamannyané sajeroning nglestariang miwah nglimbakang kawéntenan sastra lisan saking désa Bali aga.

Proposal puniki kaaptiang prasida ngicenin kontribusi sajeroning panglimbak paplajahan Bahasa Bali, utamanyane malarapan antuk pawigunan media pembelajaran miwah kawentenan sastra lisan. Kawigunan saking tatilikan puniki prasida dados silih tunggil piranti paplajahan sane dahat mawiguna, miwah manut ring karakteristik sisia.