Kalih proposal tatilikan sane mamurda “Media Kontekstual Malarapan Kearifan Lokal Anggen Nincapang Karakter Miwah Literasi Budaya Sisia Ring Sekolah Adat Manik Empul Desa Pedawa” miwah “Kawigunan Aplikasi Nulis Aksara Bali Kaanggen Nincapang Kawagedan Nyurat Aksara Bali Ring Sisia Kelas 8A SMP Negeri 4 Baturiti” kasobiahang sajeroning parikrama ujian seminar proposal skripsi Prodi Pendidikan Bahasa Bali nemonin rahina Sukra tanggal 28 Agustus warsa 2026 ring ruang Jayaprana FBS Undiksha. Parikrama puniki karauhin olih mahasisia angkatan 2023 miwah 2024 miwah angga dosen pinaka guru waktra tur guru panureksa.

Parikrama seminar proposal pinaka paletan sajeroning panyusunan karya akhir skripsi kaenter olih ugrawakia kasarengin olih juru tulis utawi notulen. Paletan-paletan parikrama seminar proposal kakawitin antuk pamahbah saking ugrawakia, kalanturang antuk presentasi utawi panlataran unteng proposal, pabligbagan utawi saur pitaken pantara panyeminar sareng pamilet, guru waktra, miwah guru panureksa, kaping untat inggih punika pamuput utawi pamicutet seminar.

Proposal sane kaajuang olih Ni Luh Putu Suantini maunteng ngeninin indik pawigunayan media sane kaanggen ring sisia sajeroning sekolah adat. Usulan proposal puniki matetujon nlatarang sapunapi media kontekstual malarapan kearifan lokal puniki prasida nincapang karakter miwah literasi budaya sisiane ring Sekolah Adat Manik Empul Desa Pedawa.

Proposal kaping kalih olih Ni Kadek Lia Samandani ngambil unteng indik media pamalajahan nyurat aksara Bali ngawigunayang aplikasi digital sane matetujon nlatarang pawigunan media aplikasi Nulis Aksara Bali sajeroning pamalajahan nyurat aksara Bali ring sisia kelas 8A SMP Negeri 4 Baturiti.

Makudang-kudang pataken, wewehan, miwah penampen kaicen olih guru waktra miwah guru panureksa sajeroning nguningin pangresepan utawi negepin proposal mahasisia. Proposal Ni Luh Putu Suantini polih wewehan indik tata sasuratan, tata basa, miwah indik unteng proposal.

Unteng utawi substansi pamekas ring adyaya siki ring dadalan pikobet patut kadagingin gatra sane nampek ring genah tatilikan inggih punika ring Buleleng minakadi gatra ngeninin indik akidik kayun sisia sareng literasi dasar aksara Bali. Adyaya kalih mangda kadagingin grand teori sane pacang kawigunayang. Adyaya tiga, mangda nuekang ring indik tata cara ngamargiang tatilikan nenten malih berteori.

Proposal Ni Kadek Lia Samandani polih wewehan indik tata sasuratan utawi teknis inggih punika sajeroning tata basa ring proposal mangda kauratiang nganggen teknik proofreading. Daging utawi substansi proposal kaicen wewehan ring adyaya siki utamanyane ring dadalan pikobet mangda prasida katlatarang malih ngeninin indik pikobet sane wenten mangda prasida jangkep.

Adyaya kalih kaicen wewehan mangda kajangkepin indik model paplajahan miwah sintak sane pacang kaanggen ring pamargin paplajahan. Sane kaping untat ring adyaya tiga, wewehannyane ngeninin indik model tatilikan miwah ngicenin pamiteges genah sang panilik ritatkala nganggen metode Penelitian Tindakan Kelas (PTK).

Malarapan antuk parikrama seminar proposal puniki kaaptiang prasida ngicenin ius ring panglimbak paplajahan Bahasa Bali, utamanyane ring kawigunan media kontekstual miwah aplikasi Nulis Aksara Bali. Kalih proposal tatilikan sane kaajuang puniki prasida kadadosang piranti paplajahan sane dahat mawiguna miwah manut ring kayun utawi kahanan sisia ring aab kadi mangkin.