Kalih proposal sane mamurda “Seseleh Penerapan Pembelajaran Berdiferensiasi Sajeroning Ngresepang Daging Satua Bali ring Kelas VIII SMPN 2 Sawan” miwah “Media Kartu Aksara Bali kaanggen nincapang kawagedan nyurat ring sisia kelas VI SD Negeri 4 Banyuning” kasobiahang sajeroning parikrama ujian seminar proposal skripsi Prodi Pendidikan Bahasa Bali nemonin rahina Sukra tanggal 28 September warsa 2026 ring ruang Jayaprana FBS Undiksha. Parikrama puniki karauhin olih mahasisia angkatan 2023 miwah 2024 miwah angga dosen pinaka guru waktra tur guru panureksa.

Parikrama seminar proposal pinaka paletan sajeroning panyusunan karya akhir skripsi kaenter olih ugrawakia kasarengin olih juru tulis utawi notulen. Paletan-paletan parikrama seminar proposal kakawitin antuk pamahbah saking ugrawakia, kalanturang antuk presentasi utawi panlataran unteng proposal, pabligbagan utawi saur pitaken pantara panyeminar sareng pamilet, guru waktra, miwah guru panureksa, kaping untat inggih punika pamuput utawi pamicutet seminar.

Proposal sane kaajuang olih Luh Rentiani maunteng ngeninin indik pawigunayan media majeng sisia sekolah adat. Usulan proposal puniki matetujon nlatarang sapunapi Penerapan Pembelajaran Berdiferensiasi Sajeroning Ngresepang Daging Satua Bali ring Kelas VIII SMPN 2 Sawan.

Miwah proposal sane kaajuang olih Ni Putu Elsa Maharani maunteng indik panganggen media kartu aksara Bali anggen nincapang kawagedan nyurat Aksara Bali ring sisia kelas VI SD Negeri 4 Banyuning. Tatilikan puniki matetujon mangda kawagedan sisia ring nyelehin wangun aksara, ngawigunayang pasangan miwah pangangge aksara, taler nyurat kruna sederhana nganggen Aksara Bali prasida nincap.

Media Kartu Aksara Bali kaanggen pinaka media visual sane nyajahang aksara Bali miwah aksara Latin ring kalih sisi kartu, mangda sisia prasida malajah antuk cara sane langkung menarik, aktif, miwah sistematis.

Makudang-kudang pataken, wewehan, miwah penampen kaicen olih guru waktra miwah guru panureksa sajeroning nguningin pangresepan utawi negepin proposal mahasisia. Proposal Luh Rentiani polih wewehan indik dadalan pikobet miwah daging proposal.

Dadalan pikobet saking tatilikan puniki patut katalarang ngenenin indik pembelajaran berdiferensiasi ring pangarep nenten ring ungkur dadalan pikobet. Adyaya kalih patut kajangkepin tata titi penerapan pembelajaran berdiferensiasi nganutin penerapan sane jagi kalaksanayang ring SMPN 2 Sawan. Adyaya tiga patut kajangkepin malih instrumen sane sampun kakaryanin ring piranti mupulang data inggih punika instryumen pratiaksa, sadu wicara miwah dokumentasi.

Sajeroning pabligbagan seminar, guru waktra miwah guru panureksa nyinahang pitaken indik alasan panilik milih judul puniki, miwah indik jejering lan panandang tetilikan. Panilik nlatarang yening judul puniki kapilih santukan madasar antuk pikobet sane kapanggihin ring observasi awal miwah wawancara sareng guru kelas.

Akéh sisia kelas VI kantun ngalami pikobet rikala nyurat Aksara Bali, utaminnyane ring nyelehin wangun aksara, ngawigunayang pasangan aksara, pangangge aksara, miwah nyurat kruna sederhana. Kartu Aksara Bali kapilih santukan prasida nyajahang wangun aksara sacara visual, praktis kaanggen, miwah ngicenin kasempatan majeng sisia anggen malajah sareng latihan nyurat.

Malarapan antuk parikrama seminar proposal puniki kaaptiang prasida ngicenin ius ring panglimbak paplajahan Bahasa Bali, utamanyane ring kawigunan media kontekstual miwah aplikasi Nulis Aksara Bali. Kalih proposal tatilikan sane kaajuang puniki prasida kadadosang piranti paplajahan sane dahat mawiguna miwah manut ring kayun utawi kahanan sisia ring aab kadi mangkin.